Ig awâer waya...

Ass mi ţmuquleγ, ţwaliγ. Degw allaγ-iw ur senwiγ ahat ad yas waya. Neγ kra yellan ad ibedel, ad yuγal wis d acut. Ger w allen-iw kra iy d iţbinen ur yelli wayen it yifen, ha d aggur, d igeni neγ ţamurt deg-i yesgwet yemγi. Tideţ, segwten yemγan ur yelli yiwen w ala sin. Imγan, ţaken-d ula d nutni imγan. Ayen ur nwiγ ad yili d akken ad yas w ass akem ţwaliγ akken telliđ ass-ayi. Tezgiđ teţakeđ-d tiżeŧ, kem s yiman-im ţwaliγ kem tugaređ anecten. Tezgiđ teţakeđ leħmala, ţwaliγ leħmala n dunit tefγed akw deg admaren-im. Ţwaliγ, ţwaliγ… ţmuquleγ, amek id neweđ γer dayi, tideţ ma muqleγ cwiŧ ar deffir żriγt ur teţuγ ur-ay iţak w ul-iw ad âeddiγ γef ayen, fiħel ma mektaγ-d kra d yellan d wayen yernan. Mi yezgiγ tama, âudeγ iman-iw am nek am wiyađ, γas wiyađ yiwen ur d yezga din.

Afrux, lawan deg-ara yesers timelalin-is ad yebrek felasent, as tifk azγal neγ leħmu is-t-id yewwin akken alma frurxen-d yegđađ. S cwiŧ ar cwiŧ agđiđ, babatsen d yemma tsen zgan s rħil ţ-ţaγwalin ţawind tuččit, skarayen-d ula d nutni tarwa id sefrurxen.  Kan akken, s cwiŧ ar cwiŧ, lâac ffi âeţben imawlan, s cwiŧ ar cwiŧ yeţegwray-ed d ilem, kra win yellan yesrafeg. Yal wa anda y ruħ, anda yesrafeg.

Ma nniγ-am-d aya, ur yelli ala nutni ig srafgen, akken d nella nesrafeg, imi aya yezga. Tezga tlalit γer tudert, yezga rħil yeţawin yal wa sani. D acu, am akken yenna weγrim, iwalaţ ula d neţţa, ass ffi tella ar tamas, taâkukef, iwalaţ ula d neţţa, ur yelli w ayen is d yeqqimen. Ţwaliγ kem ass ar wayeđ ula d kem, kra yeţbeddil deg-m, tazmert tenquqel, yewwi y-am-d im d yewwin iw akken aţ zđiđ lqed-im. Yewwi y-am-d im d yewwin iw akken ama d ifasen ama d iđaren ad bdun ad ţ neâkukufen. Hen, tiremt ar tiremt qqareγ, ayγer. Amer yiwen, amer sin ahat aţ ażay taâkwemt fallasen, teğğad tâabuŧ-im, yeğğaten uâabwuđ nsen; laż ţ-ţawant xlan tudar d iderma. Atan ţiwsiren ula d nutni, γas akken yiwen ur-am yefka laâđil; ak m iwali akken telliđ s tezmert-im yenquqlen, s w afud inem ur d negwra am akken yella tazwara. Ma meslayeγ-d fellam ur demeslayeγ γef ayeđ, ħşiγ d kem ig refden yal kra, d kem ig âemden yal kra, d kem ig zgan d lğehd, d afud, s id nbed akken nella.

 

Ur ţruγ γef yiman-iw, iw akken fellam ad ţruγ. D acu, ţwaliγ ţmuquleγ kra yellan yeţbin iy-id. I tewâer tudert i gewâer w aħnunef, i gewâer w aluy d uşubu, ig uâer win ara ţ yeččen deg tgecrar, kra yellan yewâer, wis kan ma yella segwten wid is t iţmeyizen.

Ay ul iw âeddi akkin, âeddi i tlufa. Ma bdiγ asnuzgem, ad seħsabeγ ad ţnadiγ tiwwura. Tawwurt ma tendel, amdan ma yenderkal, ig awâer waya, ig awâer wayen, aneqqar aneseħsab “ħader aγ d walin wiyađ, nekwni d at leflani w flan ccan nneγ meqwer, tara nneγ tekred wis s ansa”. La neţmermid deg tudert mremden wiyađ, iħun bab l-lemħana sarameγ am teđfer akka, ur am d yeţili w uzu t-tasa. 

 Yewâer lawan tewâer tallit deg-i neţilit, kra yellan yewâer, tażayt tesgwet, tefses i wid iţ yenumen. Ma d kunwi neγ nekwni neγ wid iγ yellan, ur neżrat d acut iγ yeţilin d acut ara γ d yilin, “Gguniγ ig guni w teras, yesersen tazzert yaâya, yeţraji lawan ad yas ad yefru w âeqa g tafa” “Gguniiγ i teguni t yemmaţ, yeţrajin tarwas addas, wa y γereb wa y cereq, rezun-d γures am y igđađ, yal wa yeţnadi ff aylas”.

Am d iniγ am desiwleγ akem-id smektiγ di lawanat sâadaγ γer tama-m, am zik am assa, uur yelli γ yellan, iγ yezdin ţafat ţ-ţiżeŧ d wussan yeţâedayen am lebraq.                                                        

Ma bedreγ-d isem-im, tugeţ ikem icban, ayγer, yiwet ar yiwet renunt ur ţenkażent, ayγer lawan deg-ara d yeγli y iđ ad qimem tecbam iqwerman, wa s yihin wayeđ s ansa nađen, ayen tuŗğam d  w ayen trebam, srafgen, yal wa s anda g ruħ dayen.                            

Tergagi tfekka, kra yellan walaγ t yeţergigi deg-m, ansa id nekker s-anid-ara ner, int-iy-id d acut uzekka, d wayeđ, anw-ara d nemyager. Mugreγ-d tiżeŧ, ufiγţ γer tama-m, mugreγ-d leħmala, tusad sγurem, im sarmeγ, im sarmaγ tugeţ l-lehna am akken tezgiđ laγ ţ-id ţakeţ.

(D Aħric seg tesgilt « Ay awal siwel γer tira muqel »  n w ass 20 Meγres 2009.)